PIPU TONGTHIM LE TONGFIM- L-R

L..
1. Lungpi hman lungte in do ta ngai: (Lungpi tumbik khal lungto fate ih a doh lo mi a um lo).
2. Lungleng khawcuan bang: (Ruahmi hmunhma um lem lo ih to cuahco).
3. Lo lai sia le fa lai sia: (Falai in zianghman ro khawm ding a nei lo).
4. Lenliam fa le sakhi: (Veivah an cak ih thu khal an thin dualdo thei zet).
5. Lengno hawh le huaihang hawh: (Fala note va ter hlah, napin an lo sik pem pang ding).
6. Leibel le kamsang khual lamhla ta co u: (Leibel le kamsang pawl hi kiangnaite ih ummi hnakin khuallam hla ih ummi hi thupi deuh le thasawn ah kan ruat).
7. Laiking puanpi tah tum bang: (Ziang hman tuansuahmi le tuahmi ngaingai nei dah lo).
8. Laiking ih or dum or sen: (Khatlam khatlam ih hminthat duh, thinlung thleng dualdo pawl).
9. Lo ram tha le nupi tha: (Innsang hrangah in-ei khop nei ko cawmtu le zohtu an si).
10.Lungtat in hnah a neih in: (Ziangtik hman ih cangsuakdahlodingmi, hlawhtlingtheilomi).
-----------------

M..
1. Mah porhawk le sakhi ngal: (Zianghman eibartlak khal nei hnai lo, rinsantlak um lo).
2. Mai’ thu (zu) thaw mai voih thaw: (Midang simmi hnakih mah ih sim le relmi tha ih ruat).
3. Mise len le tite len: (Mi nauta lennak le tiva fate lian cu reilote ah a cemsal).
4. Mithi bang le bakawh bang: (Rintlak le hmantlak ngaingai an si nawn lo).
5. Mithi thuanthu rel bangin:
(Thihni khua ah a thitu ih siatnak hnakin a thatnak hlir rel a si).
6. Mi thu cawng ih congkorh: (Mahte ngai thiammi nei si lo, midang thu khal cawng thiam lo).
7. Min dam le hur dam: (Leiram min damzomi le sual rim ngaingai nunau in mi an cawm).
8. Mi kut ih rul kaih tum: (Mah ih tuahngamlomi thil tihnung, midang tuah fial).
9. Mar fim le zawng fim: (Fim le feldan tluangtlam lo relnak).
10. Man zuri le zawng mang sia: (Zuri buaibai pawl khi zawng mang sia talbuai vek fang an si).
------------------

N..
1. Ngalcar khawn le zun rim ngai: (Ngalcar khawn pang le fala zun ngai hi a natdan a bangaw)
2. Nu le pa, lei le ha: (Lei le ha umtlang khal keu ngah pang can a um vekin nupa khal remcan lo tikcu a um theu)
3. Nui’ su hmu bangin: (Zoh ngam lo, ningzahpituk ih kun)
4. Nauhak ningzak mitthli luang, upa ningzak ha lang: (Nauhak an ning a zah le an tap ih, upa an ning a zah le an hni thung)
5. Nun sung sing lawm, thih hnu kung tlung: (Dam lai le that lai can ih midang kom le tlonciamcotu khal an thih le siat an ton ni ah cun sungkhat naite thotho in an tuamhlawm sawn)
6. Naute pangpar hman bang: (Naute pangpar hmang cun a dang a hmuh in a kenlaimi a hlon ih a dang a ngen vivo)
7. Nu thlum Pa al: (Nu le pa hi khatlam khatlam ah thatnak le duhnunnak an nei veve)
8. Nam linglet hum bang: (Mah le mah tina-awtheimi thu le tuandan dik lo)
9. Nu neh lo, Hlei Tawl vuak: (A tuartu ding si lo, midang parih tuarnak thleng)
10.Nunau hrem lo le thlawhri hai lo: (Nunau le thlawhri cu a luarkai tuk hlanih khap le haifai lohli a tul)
11.Nupi thih le phartlang bal: (Nu an vung thih cun phar nei lo vekin umdan kim thei lo in a lawng viarviar thluh)
12.Nung cungih lukhawng rel/nam lo ih lu lak: (Mi ih siatralthluhnak ding tiangih an parih thu tuah)
13.Na tong in sai ruh a deng kiak: (Sup mi nei lo in mi ih thinnatnak ding tong hluahhlo men)
14.Nunau ihpi le thal ti in: (Duh khop ti a um lo, in tam, tuah tam le a duh tam deuhdeuh)
----------------

‘P’
1. Pate thin le lo ar ah: (Thu ruatsaulemloin an thin a tawi lohli theu)
2. Pil her kum le pam tong: (Tikcu can thlengawk zawngah thathnempi lam si lo ih sunralnak tong)
3. Pangpar mawi hman in hling a nei: (Fala mawite khal kimlonak pakhatkhat an nei thei)
4. Puan sung zang fil: (Thuthup, midang theih lo ih tuahmi)
5. Pasal thih le luangpi cim: (Pa bik a thih cun innsang zate’n a cimbal thluh thei)


‘R’
1. Rawl i lakah rawn tong: (Rilrawn laifang ih ei ding um mi pohpoh hi rawl thaw bik a si)
2. Rul in rul ke a hmu: (Mi thinlung tha lo cun midang thatlonak hlir a hmu ringring)
3. Ral i hnuah senkip tlo: (Thil a poimawh lai ih tuah ngah si lo, a luan hnuih cangvai ciamco)
4. Rukfir dum lo in a tlan: (Mawhnak simaw dik lonak kan tuah cun kan ral a hrut)
5. Ruahpi cen le nunau phunciar: (Umdan a rem thiam lo, ninum le mi hnaihnok men a si)



Source: CHIN (FALAM) CASIAR BU
Credit: vapualforum
Link   : https://vapualforum.com/viewtopic.php?f=24&t=54