teih fapa neihsun a si ih kum 1895 ah Tlauhmun khua ah a suak. A suah hlanah
mang an manmi cu, Singai Lal hlun Pu Ro Za Thang ih mang ah “Vancungmi in
pumtek thipi hlum, ke zungpi tia pakhat a pek”. Pu Ro Za Thang cun, ‘Pu Van Nawl in
fapa a nei ding’ ti a theihthiam ruangah a mang cu a va sim. Asinan Pu Van Nawl cun
lung dok, lung dok lo in a um. Ziangahtile, a nupi in fanu lawnglawng a hrin theu
ruangah a zumtheilonak a si. Dokhar Lal Pu Than Zam khal in mang pakhat a
manmi cu, a thizomi pa, Pu Thla Ceu in, “Than Zam, na u Van Nawl in fapa a nei
ding. A hmin ah Thang Tin Sawn nan sak pei”, ti in a sim hnuah a thang. Pu Van Nawl
ih nupi Pi Khuang Tin Tial khal fa a von ngaingai ih a suah nithla a kim tikah fapate
a hring ngaingai. Nau hmin sak ding an pol tikah Pu Than Zam mang ih Pu Thla
Ceu simmi “Thang Tin Sawn” cu an duh bik. Asinan mithi sakmi hmin za teih lak
thluh a tha lo an ti ih nau hmin cu, Thang Tin Lian ti in an sak. Pu Thang Tin Lian
in suahpi farnu pasarih a nei.
Pu Thang Tin Lian cu kum 1906 in Falam Burmese Middle School ah tlawngkai
a thok. Kum 1913 ah phun sarih a ong. A tlawng kai laiah ca a thiam thei zet. Chin Hills
Superitendant Mr. Street khal in laksawng ah ngun tangka a pek. Cozah phun sarih
camibuai ah khal Kawl ram sungah pathumnak a ngah thei ti in U Po Khaw (Assistant
Inspector of Schools) in thuthang ah a than dah. Pu Thang Tin Lian cu mi cakvak, ram
tawi thei zet a si ih sa kaap thei zet khal a si. Ramsa phunkim, Vui, Fung, Pawpi,
Tlavang le ramsa dang tam pi a kaap. Amah cu ruangrai tha, mi cak zet a si ih a san lam
khal pinga le ruhpibok pahra a sang. A pa Pu Van Nawl A.T.M hminthatnak laksawng
a lak lai ah khal Shwedagon Pagoda a sannak bik, zohman kaingamlonak hmun a kai ih
cuih hmun in tih lo tein leilung ah a dawp dah an ti.
Pu Thang Tin Lian kum 23 a kim, kum 1918 November 11 ni thok in Miuk
hnatuan a thok. Zahau ram le Hualngo ram sung khua 83 a uk. Laitlang Miuk lakah
uk kau bik a si. A uk sung khua zate kumkhat vei khat a tlawng ringring. Khua sung
thu nei duh, mi toaw, khua upa thungai lo, nuncan tha lo tla an um le na pi in a cawh
ih a hrem theu. Curuangah a uk sung mi hmuahhmuah in an tih ngaingai. Khua kip
in an tih, an upat ruangah Mirang cozah vekin khuabawi le tlangsuak upa pawl in zu
27
le ei tha a phunphun thawn an ram ri ciar in an hmuak theu. Khuakhat le khuakhat
karlak lamzin sialfai ding le khua sung thianfai ding hi a duhbikmi a si.
Pu Thang Tin Lian in a uk sung thu buai le hnahnawhnak um lo tein a
fingkhawi ih tlun lam bawi upa thu ngai in hna a tuan ruangah meithal zunphir le
hminthatnak capi Mirang cozah in laksawng a pek. Kum 1935 ah India Goveror
General in Silver Jubilee Medal le hminthatnak A.T.M a pek.
Pu Thang Tin Lian Miuk a tuan tikah Tlauhmun khua ah inn dothnih a sak
ih a inn cu tlorthing ahtermi, a uk sung hmuah a puttermi ih kulhmi a si. Zaute
pizakhat sau, pihleiriat kau tlarhnih khal a donter. Kum 1917 ah Laimi pawl France
ram ih Labour Corps tuan ding in Mirang in an rel. Zahau uk sung France ram feh
luat thei dingah Pu Thang Tin Lian in Rs. 1000/- Mirang a bawm.
Pu Thang Tin Lian in a uk sung Kawl le Lai ram ri, Lusei le Lai ram ri thuhla
ah tla Mirang bawi pawl thawn relkhawmnak an nei theu. Thu hman le thu dik
thawn thu a rel thei ruangah a uk sungah thu buai a um lo. Kum 1941 Decemer 8 ah
Japan pawl Kawl ram an lut. Mirang in Lai ram ah Western Chin Levi an phuan zo.
Kum 1942 May 11 ni ah Mirang bawi in Pu Thang Tin Lian cu Local Assistant a
tuanter ih thla khat ah Rs. 200/- a pe theu. A fapa Lal Bik le Sum Mang khal officer
cadets ah Rs. 250/- in hna an tuan ih Champhai le Lai ram lak fangcang le thilri
dangdang Mirang a phurh bawm hngai.
Mirang cozah in Pu Thang Tin Lian uk sung hmun dang ih vaai pawl inn
zuartheinak a on ruangah lungkim lo in Yangon Mangki bawipa Mawlaih ah a vung
tong. Mangki bawipa in, “Inn zuar na kham thei, rawl zuar khal na kham thei” a ti.
Kum 1937 January 23 ah Magwe Mangki bawi Laitlang a tlawng ih, Miuk in siah
rawl kumkhat ah innkhat in relhnih lawng a co ding. Miuk ih ngahmi innthawng
tangka burkhawmmi Lal in a hrek dok seh, ti in thu a suah. Zathlir Lal in a thlunih
Yangon ah Lal hmuahhmuah an lungkimlonak lu pu dingin an feh. Falam Vuanthok
in feh lo dingin a kawh ruangah Zathlir Lal cu a kirsal na in Pu Thang Tin Lian cu
kir duh lo in Yangon a thleng ih 1937 August 25 ah Tlau a thlengsal. Kum 1943
November 17 ah Janpan pawl in an ko ih Falam ah hna an tuanter. Mirang pawl khal
in Japan pawl thawn pehtlaihawknak neih an zum ruangah Hualngo Area cu a uk
sung in an laksak. Kum 1945 September 5 ah Tlau ah an kuatsal ih Zahau ram khua
30 a uktersal. Pu Thang Tin Lian cu kum 1946 ah Falam peng ai-awh in Yangon ah
miting kai dingin a suk. 1947 May ni 6 ah pumpi ahcia zo a si ruangah dam thei
nawn lo in 1947 May ni 10 ah a nunnak a cem ta. A ruak cu Tlauhmun ah an tlunpi
ih kum 1947 May ni 24 ah an phum.
Source: CHIN (FALAM) CASIAR BU LEVEL I (A)
Credit: vapualforum
