Thuserh timi hi kan zum tuk lo a va si hman ah mi vualvo ih ttawmawk mi kan nei. Tthimnak ah cabuai pakhat ih minung hleithum to, zanriah ei lai ih sabitti peksawngawk, kaililawn hnuai ih feh, tivek pawl. Cun, kan bulpak thuserh pawl khal hi, kan rualpi pawl hrang ahcun hnihsuak thil an si thei ko nan, kanmai’ hrang ahcun diknak an nei thei zet ve.
Ramtawi pawl hi minung dang pawl hnak in thuserh an nei luar cuang maw ti cu ka thei hran lo. Asinan an thuserh pawl hi an la urhsun thei zet timi cu ka thei. Ka rualpi pakhat cu sa picang pel ding ih ram a tawih tinte’n ziandawng panga a keng ringring. Cuhnak ih tam siseh, mal siseh, a duh lo. Ka rualpi dangpakhat lala cun ziandawng pasarih ciahciah a keng ttheu. Saklam India ih sa picang peltu ramtawi pacang theih hlawhbik a si mi ka rualpi dang pakhat lala cu, mahseer nga that hmaisa ta lo in thlatang caan ramtawih ah a poksuak dah lo. Kei ih bulpak thuserh cu rul thawn an pehpar aw. Milai dehtu hawl ih ram ka tawih can ah, ziangtluk in ka zuam rero a si khalle rul pakhat ka thah hmaisat ta lo ahcun ka zuamnak hmuahhmuah cu thuhlolak men ah an cang ding timi zumnak thuk zet ka nei.
Vei khat cu May thla ni ling lakah khawvan ihsin khawthim tiang, hawl hmuh harsa zet milai dehtu hawlsuah tum in tlang hrap ttentten pawl ah peng siar cawk lo ka suk ka zo. Hlingrul sah zetzet lak ih ka fehnak ah ka kut le khuk pawl cu se zet in an rin ttial aw tthengttheng. A ni hleinganak siimlam ah, bang hnianghniang in pindan pahnih um Hramlak bangla ih ka ra tlung. Cutikah khaw sung ih ra palai pawl in in rak hngak hai ti ka hmu. Annih cun milai dehtu pawpi cu cumi sun ah an khaw hnar ih an hmuh thu in sim. Thuthang theih hiar um zet a si. Cumi zan cu a tlai tuk zo ruangah zianghman tuah a theih nawn lo. Curuangah palai pawl cu mei-in vang in ka tlunter hai ih, a thaisun cu zohman an inn ihsi suak hai lo ding ah khoh zet in thupek ka suah.
Video edit na thiam duh maw? 
