Kan hnipuan hruh in ziangtlukin kanmah ah thu a sim. Zoh kan mawiloh ih kan hnipuan hruh sinpi lemloh cun milakih kan tlandan le kan umdan kan cangvaihdan tiang a rem thei lo a si. Zohmawi ding cun mahthawn milaw hnipuan kan hruhthiam a tul. Milakih hruhtlak tuk lemlo manawl tete pahnih pathum lei ai cun man awmang ve zet tulai uar hnipuan pakhat lei a tha deuh. Tulai uar le design suakthar tinten lei ih hruh ding tinak si lo in, ulukaw zetin hnipuan faite mah milaw hrilih hruhthiam a tul tinak sawn a si.
2.Lamfeh nawt deuh aw (Walk faster):
Mi pakhat hi ziangtin so a um ti theihtheinak awlsamzet pakhat cu a fehdan zoh in a si. A feh muang maw? A bang so? A damlo maw? Lo le a phurzet maw, tuahding nei vek in maw a feh? Mah le mah zumawknak nei pawl hi muang ten an feh dahlo ti a si. Fehnak ding an nei. Mi tawnding an nei. Lo le hnatuan ding thupi zet an nei theu. Na manhlap lo a si khal le mah le mah zumawknak na neihnak dingah tuih na rak feh theu dan ih 25% in vun nawtaw deuh aw. Cu cun mi thupi zet le raltha zet in a lo tuah ding.
3.Umdan/Cangdan mawi (Good Posture):
Kan umdan le kan cangdan in kan thu a rak rel zet. Mi thawn nan biakawk lai si maw, thupi hlapi nan rel lai ah thildang zohin le na ruangpi na taksa cang hniaihniai in rak um hlah. Nan biakawk a si le an mitah zoh aw. Na ding khal le ngil zetin ding aw la na lu khal hawi kual rero lo in. Himi na umdan in mi dang hrangah mi thupi zetah a lo tuah dingih mah le mah zumawknak nei dingin tampi a lo bawm ding.
4.Mahte thazang lak le pekawk (Personal Commercial):
Mah le mah zumawknak neihnak hrang ih thupi zet pakhat cu fawrhnak lo le thazang pekawknak ngai hi a si. A sinan, cu vek ngai ding a um ringring lohtikah mahten kan thiamzawng, kan cah zawng le kan ti thei zawng kha thei ringring in mahten fawrhaw le thazang peaw ringring ding kan si. A tul ah cun thlalang hmaiah khal mah le mah zohaw ih thazang pekawk hi thil tha zet le tang kai zet pakhat a si.
5.Lungawi thiam (Gratitude):
Na duhnak lawngih na thinlung na ret tuk a si le na ti thei lo le na ngah thei lo canah na riah a lo ti se ding. Thiamlo le tuah theilo vek tiangin thinlung na neihphah thei. Cu cun beidawnnak ah mi a hruai thei ih tuahsal leh tuansal a lo tih ter ding. Lungawi thiam ziraw la a hlanih na rak tuahtheimi pawl, na thiam mi le na hlawhtlinnak pawl kha ruatsal in theisal theu aw. Cu pawl cun a lo phur ter ding ih tuan caknak le hlawhtling dingih zumnak a lo neih ter ding.
6. Mi lawm/porh aw (Compliment other people):
Mah le mah thiam lo tuk le tling lo tuk vekih mi hmaiih kan ruatawk leh kan relaw ciam co theu hi mi dang hrangah ngai nuam lo le an mah zuamtainak tawngkam tiang in an rak ruat thei a si. Cu ruangah rualpi lo le na hnatuan pi pawl thawn nan biakawk tikah an thatnak le an felnak, an thiamnak pawl kha fak sawn aw la lawm thiam aw. Mi ih an thatnak na va hmu leh na va lawm thiam hrimhrim kha na pitlin zia na rak lan ter a si ih na um khal a nawm ter ding.
7. Hmaibik ah to aw (Sit in the front row):
Tlawngin ah siseh, biakin le mipi umkhawmnak ah mi tamsawn cun a dungih um le to an hril sawn. Ziangah ti le mi theih an phangih hnatuan fial le tih ding fial an tih ruangah tla a si. Cu cun mah le mah zumawknak an nei lo zet tih a fiang ter a si. Khuitawk hmun khalah siseh, a hmaisa bik ih din/ to cuh ringring aw la a rei tikah tihnak na nei nawn lo ding ih milakih mah le mah zumawknak a lo neih ter ding.
8. Na aw suah aw (Speak up):
Mi tampi thawn nan umnak ah siseh, meeting maw lo le thupi hlapi rel khawmnak ah siseh na ngaidan le na hmuhdan pawl tih lo in relsuak ve aw. Mipi lakih thurel a lo ral that ter dingih cu cun mah le mah zumawknak tampi a lo neih ter ding.
9.Cangvai aw (Work out):
Na thilti mi le na tuahmi ah na thinlung pe lo in na taksa khalin phur zetin cangvai in tuan cih tum aw. Dan felfai te nei in tuan rang zet le taima zetin na thiltum mi kha na taksa rori in thlun seh. Na um a lo ti nuam dingih na thilti ah na lungawi ding.
10.Mi bawm ding ruat aw (Focus on contribution):
Mah duhnak lawng kan ruat tuk ruangah mi dang pawlih an pawihai kan rak ruat thiam nawn lo theu. Mi kan bawm tam le kan mah khal kan hlawhtling vivo hi a si. Cu cun zumawknak neihnak dingah tampi mi a bawm a si.
Source: Singapore VT ta lak mi
vapual
Site Admin
User avatar
Posts: 158
Joined: Mon Jan 13, 2014 11:18 am
Location: Singapore
Credit: vapualforum
