SUAHNAK KHUA LE RAM
Pu Van Kyi cu Falam peng Locom khua ih um Pa Khuang Zal le Nu Saw Hlai te
ih fapa upa sawn a si ih kum 1929, February ni 8, Locom ah a suak.
TLAWNGKAINAK
Kum 1937 June in Congkua phunli tlawng ah tlawngkai a thok ih 1942 kum ah
Falam Acozah A/V tlawng in phunnga a ong. 1942-1944 sung cu Leitlun ralpi
veihnihnak ruangah tlawng a pit thluh ih khua ah Lothlo in a um. Kum 1945 in Falam
ah tlawng a kaisal ih phun sarih tiang a zir. Phunriat ihsin phunhra tiang cu Rangoon ih
St.John Diocean Boys High School le Cushing High School ah a kai ih 1951 ah phunhra
(Matriculation) a ong. Kum 1952 in University of Rangoon phunsang tlawng a kai ih
kum 1956 ah BA (Ed) a ong. B.Ed dikari cu a hnu ah a ong leh.
HNATUANNAK
Kum 1956 June ihsin Mindat State High School sazaci a tuan thok ih kum 1968
ah Burma Educational Service (Senior grade) vuanthok rank in Lairam hmun dangdang
ah High School sazaci a tuan vivo. Kum 1972 ah Myone Tlawng vuanthok (TEO) a
ngah. Kum 1977 December thla in Hakha khua ih Chin Pinee Pingiazi zungah Pinee
Pingiazihmu bawmtu (Sitsizi) a tuan. Cu theh in Pinee Pingiazihmu bawmtu (Simaan)
a tuan. Kum 1985 July ni (1) in Chin Pinee Pingiazihmu (Sitsizi) a ngah ih 1988 June
ni (12) ah Pinee Pingiazihmu a ngah. Kawlram hmun dangdang ah tuanloin kum (35)
sung rinsantlak le zuamzet in Lairam sung lawng ah tlawng le zung ah fimthiamnak lam
hna a tuan. Kum 1991 January ni (1) ah kum kim pinsin a laak. A tu tiang a dam lai ih
HNATUAN SUNGIH RAMLEENG A FEHNAK
Kum 1962-’63 kum khat sung United Kingdom (UK) ah ca a zir ih Post Graduate
Diploma in The Teaching of English as a Foreign Language (TEFL) a ong.
Kum 1975 September thla ah zarh hnih sung Japan ram ah fimthiam zirnak zoh
dingin a feh.
HNATUAN A CEEMCIHMI
i) A hnatuan sungah ahmaisabik Pituh Hluatdaw palai a tuan ceem. Chin Pinee Pituh
Khawnsil khal a tuan ceem.
ii) Calai lam nganmi le suahmi pawl
a) Pawlpi Thuthangca ah Editor bawmtu a tuan.
b) English-Chin Dictionary 1954 ah a ngan ih a suah.
c) Baibal Thuanthu cabu 1955 ah a suah.
d) Thinlung Thlalang cabu 1955 ah a suah.
e) 1960 kum ah Rev. E.Kyon Bil thawn Thang Tsin Mekazin an suah thok.
f ) Laica le a Ngandan (Chin Orthography) cabu 1993 kum ah a suah.
PINSIN HNU IH A HNATUANMI
i) 1991-2003 sung Falam ih Zomi Theological College ah Mirang cazirhtu
ii) 1995-1998 sung Zomi Baptist Convention Treasurer
iii) 1998-2003 sung Zomi Baptist Convention Treasurer bawmtu
iv) 1995-2001 sung Falam Baptist Association Advisor le FBA Constitution Drafting Committee sungtel
v) Falam Baptist Church ih Deacon ah Vice Chairman a tuan
vi) Zanniat tong ih Thukam Thar lehmi a zohfelsal, Saam le Thufim khal a letcih.
vii)Tulaifang ah cun Chin (Falam) casiar suah thei dingah committee thawn a zuam
rero. Cun, Chin (Falam) - English Dictionary (A awsuah phonetic thawn nganmi)
a tuah theh ih suahsaktu ding a hawl rero lai
Upat Sunloihnak a ngahmi
i) Acozah ih pekmi “Ahmuhthan kawng Tacik” . 1998
ii) Falam Chin Christian Literature Society (FCCLS) ih ‘Falam Calai Hram in
bunsaktu’ ti ih pekmi Capi. 2004
iii) Chin National Day Silva Jubilee cangsuak Committee ih pekmi ‘Sunloihnak
Capi’
iv) Chin Calai thansonak dingah thiamnak le thazang suah ih taimazet ih hnatuantu
sinak ‘Cope Calai Lawmman’
v) English-Chin Dictionary nganhmaisabik ruangih Laimi Zirsang Pawlkom ih
pekmi ‘Sunloihnak Capi’. 2007
Source: CHIN (FALAM) CASIAR BU LEVEL II (A)
Credit: vapualforum
Link :https://vapualforum.com/viewtopic.php?f=19&t=80
