ah a suak. A pa cu Wkh Major Kap Cong (MBE; BGM) a si ih a nu cu Pi Lang Hngel
a si. Suahpi unau pali a nei ih amah hi upabik a si.
Kum 1925 June in tlawngkai a thok. Phun hrek ihsin phun li tiang Congkua
phunli tlawng ah, phun nga ihsin phun sarih tiang Falam Middle School ah, phun riat le
phun kua cu Sagaing High School ah, phun hra cu Rangoon ih St.John High School ah
a kai ih 1937 kum ah phun hra a ong. I Sc cu Rangoon State College in a ong. Second
MBBS cu Rangoon Medical College in 1940-41 ah a theh. Kum 1943 in India ram ih
University of Lucknow ah sibawi a zir peh ih kum 1949 December ni (20) ah MBBS
dikari a ngah. Laimi lakah a hmaisabik MBBS dikari ngahtu a si.
India ihsin a tlun tikah Rangoon ih General Hospital (RGH) ah hnatuan a thok.
Kum khat RGH ih hna a tuan hnu kum 1952-1955 sung England ram ih Edinburge
University ah Surgery Special in a zir ih ‘A’ class in a ong. Kawlram sungah FRCS dikari
ngahtu a pahnihnak a si. Curuangah acozah upa in Rangoon ih sibawi zirnak tlawng
sazaci (professor) tuan dingin hnatuan an pek. Asinain a pa ih thu a ngainak in siseh,
amah thinlung suak ih Lairam le Laimi phun a seherhnak ruangah siseh Rangoon ih
Professor tuan dingah cohlang lo in thu a khirh. Curuangah amah ih hrilnak bangin
Falam sizung ih hnatuan dingin kum 1957 ah acozah in an thlah.
Falam sizung ih hnatuan a thok tikah Falam sizung cu ihkhun (75) a um. Amah
ih Special a zirsuakmi cu Surgery a si bangin thilri umsun thawn hna a tuan ruangah
mina tampi in Falam sizung an ra pan ciamco. Hnatuan thei dingin tlunlam upa pawl
hnenah thilri a dil theu ih an pek theu ruangah operation tuahtheinak thilri tla kim in a
um thei. Culawng si loin kum 1963 ah ihkhun 100 ah acozah in a than. Mina ihnak
ding innpi pathum saknak tla a ngah.
Dr. R.Ni Khuai Falam ih hna a tuan sungah Nu le Nauhak kilkhawinak (MCH)
a din ih a hlawhtling zet. Cun, nauhak kilkhawidan ca-uk, First Aid ca-uk, sii indan le
sii eidan ca-uk le Harhdamnak ca-uk pawl tla a tuah.
Dr.R.Ni Khuai cu acozah hnatuantu pakhat a si bangin Falam ih kum hleihnih a
um hnu kum 1969, December ah Mandalay sizungpi ah a thawn. Kum 1971 ah Mandalay
ihsin Yamethin ah, kum 1973 ah Meikhtila ah a thawn. Meikhtila sizungpi ih kum ruk
hna a tuan hnu ah kumkim pinsin in kum 1979 ah pinsin a lak. Pinsin a lak hnu ah
Meikhtila ih anmai’ inn ah kum hleikhat a um. Kum 1990 ah England ram, Town
Bridge khua ah a nupi Jasmine Hope ih fingkhawi ding le tuamhlawm dingin a feh.
Wkh Dr.R.Ni Khuai cu kum 2003 May ni 8; amai’ kum 82 a kim tikah leitlun a
nunnak in a cawl. Fapa (6) le fanu (4) a nei.
Source: CHIN (FALAM) CASIAR BU LEVEL II (B) ta lak mi
Credit: vapualforum
